【新聞】「咱敢會曉講臺灣話?」愈來愈濟外國人來考臺灣台語認證
教育部臺灣台語語言能力認證考試,115年第2改的考試,頭工是對7月25(拜六)起鼓,這日會考A卷,隔轉工7月26(禮拜)考B卷。這擺全國設18个考區,攏總有73間學校鬥辦。報名的總人數有1萬1,911人,內中報欲考A卷的有7,427人;B卷的4,484人。按職業類別共看,猶是學生囡仔組著頭名,今年就有7,149人報名,歲聲對13歲到15歲的有3,102人,占學生組的43.39%,閣來是7歲到12歲的有2,756人,占38.55%。
這改報名的外國考生攏總有23位,是這5冬來頭擺有上濟外國人來考的。這改有一對印度籍的翁仔姐做伙報名,Anlin Shaju佮Vineeth Jacob目前𪜶攏佇國立陽明交通大學讀冊,Anlin Shaju認為甲都有機緣通來臺灣讀冊,著愛深入了解臺灣文化,融入臺灣社會,伊認為語言是認捌一个所在上快也上要緊的法度,毋才堅心欲來學臺灣話,伊嘛講因為學本土語言,予伊佇臺灣的生活閣較有意義。另外,Vineeth Jacob有按算欲佇臺灣允頭路,毋才嘛決定欲學咱的臺灣話,向望食頭路了後,通佮同事互動建立閣較好的人際關係。Vineeth Jacob表示伊是利用學校開的臺灣台語課,才開始有系統性咧學咱的話。若是拄著校園有臺灣台語的演講,伊攏會拚去聽,予家己增加學臺灣話的機會。為著欲準備這改的考試,伊嘛定定看YouTube頂面的影片,佮考試網站提供的學習資源,目的就是共家己的語言能力提懸。
有一位對日本來的Tomohiko Shinkai,趁來臺灣𨑨迌的時,嘛順紲報名欲考這改的認證考試。Shinkai桑會想欲深入了解臺灣,除去有臺灣朋友咧汰,嘛是因為拄䢢有讀過王育德先生的著作,去予育德仙為欲保存母語的付出佮拍拚感動著,才會對臺灣台語起興頭,今都學五冬囉。Shinkai桑也真綿精做意致咧學咱的話,逐月日佇東京攏會辦相關的交流聚會,提供人佇日本地就通學臺灣話的機會。對寢頭全然聽無臺灣台語,到這陣有才調真自然佮人用臺灣話托,予人感覺伊的口語袂輸是在地人,這予Shinkai桑真誠有成就感。
這改猶有一位10歲的張同學,伊對4歲就開始學咱的臺灣台語。猶未入學讀冊進前,𪜶阿母就定定𤆬伊去臺北參加台語路協會成立的「台語路共學團」,𪜶創造沉浸式的母語環境,予囡仔自然講母語、用母語耍,囡仔毋但語言能力大起磅,嘛按呢熟似真濟朋友,這是張同學上珍貴的學習記持。𪜶嘛有參加文化部辦的「培育台語家庭計畫」,起造會當自然講臺灣台語的生活環境,予囡仔平素時仔就通佇母語的情境浸汰,嘛予家庭佮臺灣台語文化的連結閣較貼峇。
這擺考試的成績,按算對115年10月12早起9點開始,佇認證網站就通查,嘛該然會寄成績單通知。電子證書對115年11月初2就會寄,考生若一禮拜內無收著的,才請佮國立臺灣師範大學聯絡。以上的資訊,攏會刊佇115年「臺灣台語語言能力認證考試」的網站https://ttg.moe.edu.tw,若猶閣有問題嘛通敲咱的服務專線02-77499511照會。
公告時間:2026-07-25