【新聞】展現咱的臺灣台語力!教育部116年3月認證考試報名即時起鼓(臺灣台語版)

新聞稿音檔

  教育部按算佇116年3月佮7月會辦2擺的臺灣台語認證考試,今嘛共佮這2擺考試相關的重要日程表攏公佈佇認證考試的網站矣(https://ttg.moe.edu.tw)。116年3月的臺灣台語認證考試,報名時間對115年10月27早起9點開始,到11月23下晡5點,無限定身份,凡若有興趣的人,攏會當佇線頂報名。報名費250箍,未滿19歲的咱猶會特別優待免抾錢。測驗所有的項目(聽、講、讀、寫4項)若攏考有齊著的,咱猶有攢1份紀念品欲來相送。

  著特別提醒考生的是,A、B、C三卷考試攏齊改做「電腦化測驗」(毋過書寫測驗猶原用紙筆作答)。閣再,猶未讀冊的細漢囡仔(6歲以下)抑是歲頭較濟(65歲以上)的人若欲考A卷,煩惱家己用電腦考試加減會有困難的,嘛通申請特殊服務,簡章有詳細的說明嘛會刊佇咱的官方網站。為著欲予考生適應用電腦考試,教育部有佇認證考試網站的「自學資源」專區設一个「電腦化測驗線頂模擬平台」佮測驗簡捷包,歡迎考生才較捷來試用看覓咧,予咱通冗早適應。

  116年3月這場的考試有考A、B、C三卷,分做兩工辦。3月初6(拜六)先考A卷;3月初7(禮拜)才考B佮C卷。7月彼場就干焦考A、B兩卷。

  另外,考生的成績若是達到各級的通過標準,對115年開始就已經攏改寄電子證書。無紙化政策毋但是較環保,論真也省去寄送的時間,閣再考生就免驚證書會拍無抑是各樣去,予逐家省事事省,嘛免煩惱證書會有假包,咱政府也有設「教育部電子證書驗證系統」通查證。

  有關考試的相關消息,攏會共刊佇認證考試的網站,佇「最新消息」遐就查會著。若猶有其他考試相關的問題,才請聯絡承辦單位國立臺灣師範大學。電話服務專線:(02)7749-9511;嘛有服務信箱:ttg.sce@deps.ntnu.edu.tw。


公告時間:2026-10-30
更新時間:2026-10-30

回首頁